التشفير (الانكريبشن)

يعني ايه تشفير او انكريبشن / Encryption

بص يا معلم التشفير ده او الانكربشن حاجه بسيطه جدا 

تخيل معايا كده انك واقف في الشارع وبتنده عبدو صاحبك بصوت عالي وييجي ميت واحد سامعينك. تخيلت خش بقي انك بتعمل كده في تجمع في نص العالم؟؟؟ احيه عالفضيحه 😀

غير ان أساسا انت بتنده عبدو عشان عايز تاخد منه فلوس عشان تشتري حاجه . عربيه مثلا. تخيل كده بقي قدام العالم كله انت بتقول يا عااااابببببددددووووووو هات ال٢٠ الف جنيه الي معاك. احيه تاني عالجرصه 😀

اخر حاجه بقي . أساسا عبدو مش هيدي الفلوس لا أي حد تاني لازم انت شخصيا تاخدها يدا بيد.... حبيبي يا عبدو… لاء مش هقول احيه المرادي طبيعي عبدو بيحمي نفسه وبيحميك فا مش هيديها لحد

واحد فتك ومقطع السمكه وديلها هيقول طاب ما انا ممكن اروح لعبدو واخد منه الفلوس اندهه ليه. هقوله يا بشمهندس انت من اذكي ١٠ في العالم علفكره ، عارف ليه؟؟
لان احنا اتفقنا من الأول ان انتو الاتنين في سوق بس علي كبير يعني زي استاد القاهره بتاع ميت مره. هتقعد تدور علي عبدو في وسط مليون بني ادم مش شايفها صعبه شويه دي.

فاهم ياسطا ولا لسه موصلتش. لو موصلتش يبقي متكملش قرايه انت كده زي الفل

شكلك فاهم وقررت تكمل قرايه ، نكمل قرايه

طاب ما انا اتفق مع عبدو علي كلمه سر وابعتله حد (هنفترض اسمه محسن) ياخد الفلوس منه ومحسن ده بعيدا عن الامانه وكده بس هوه ده الي موجود وهنفترض انه هيبقي حريص علي تسليم الامانه

بس اتفقنا ان المكان ممكن يبقي بعيد . بعيد فشخ.... فا محسن برضو اتفق مع واحد تاني اقرب لعبدو وسلمه كلمه السر وواحد يسلم واحد يسلم واحد لحااااد ما وصلو لعبدو واخدو الفلوس رجوعا بنفس السلسله وممكن تبقي سلسله مختلفه كده كده الفلوس هنضمن انها هتتسلم.

طيب ابوعبيد كان واقف في نص السلسله دي وقاعد رامي ودن علي اتنين بيكلمو بعض بصوت عالي (عشان قولنا مفيش وشوشه ، كل الكلام بصوت عالي) وسمع اسم عبدو وكلمه السر وكمان عارف انه هياخد العشرين الف..... تخيل كده كل شويه حد يقول بصوت عالي عبدو هات العشرين الف الي معاك وكلمه السر بلبل...... الله يرحمك يا عبدو

اكيد عبدو هيلاقي نفسه قدام ١٠٠ واحد كل واحد فيهم عارف كلمه السر هيدي الفلوس لمين فيهم؟؟؟

وهنا بقي ييجي اهميه التشفير ، او الانكربشن

بمعني ايه

أساسا انت وعبدو اتفقتو ان انتو هتحولو الحروف في كل الكلمات لارقام بحيث الراجل لما ييجي يتكلم بصوت عالي يقول ارقام بس من غير لا حروف ولا كلمات. كده الي هيتقال بصوت عالي مجرد مجموعه ارقام محدش هيفهم منه حاجه ولا حتي الناس الي بتنقلها. مجرد مجموعه ارقام وبس.

كده انت ضمنت الاتي

اولا: محدش عارف معني الرساله ايه ولا بيتقال فيها ايه وده في علم الكمبيوتر اسمه البرايفاسي او الخصوصيه User’s Privacy او مالاخر محدش عارف انت عايز ايه من عبدو اصلا.

ثانيا: محدش هيفهم الرساله كل واحد بيسلمها للي وراه وخلاص  ، عبدو بس الي هيفهمها في الاخر. وده اسمه correct information يعني الوحيد الي هيديك الفلوس هوه عبدو مش عبدو واكرم ومحمد واحمد وتتحاكم يامعلم من اين لك هذا. فا الانكربشن بيضمنلك الحمايه او السيكيورتي ان عبدو بس الي هيديك الفلوس مش حد تاني

ثالثا بقي واهم حاجه. في مواقف تانيه ممكن تطلب فيها معلومات مش قد كده >:-) يعني فا اكيد مش هتبقي عايز تسيح لنفسك يعني. فا كل اللعب ان التشفير علي شبكه الانترنت بيضمنلك اهم حاجتين في الدنيا سريه الداتا الي رايحه جايه بينك وبين السيرفرات وخصوصيه الداتا ان محدش في الاخرعارف هيه رايحه لمين لان كل واحد بيناول الي بعده وخلاص

دي كانت طريقه مبسطه لازاي انت لما بتكتب أي عنوان علي الانترنت بيتحول من جهازك لأول سيرفر وتاني وتالت وههكذا لحاد ما الموقع يرجلك بداتا بتشوفها علي الشاشه وتفضلوا انتو الاتنين تكلمو بعض بحاجه اسمها باكت ، الباكت دي عباره عن مجموعه التعليمات بتتغلف مع بعضها وبتتبعت علي الcyber web وساعات عشان نبقي محددين اكتر في نوعين من الباكت نوع اسمه ال request عشان انا بطلب من السيرفر الي في مالطا داتا معينه وهوه بيرد عليا بالداتا بالنوع التاني والي اسمه ال response ان تمام يا ريس انا سمعتك وادي الداتا الي كنت عايزها.

الموضوع ده كله بيتم في اجزاء من الثانيه تخيل انت رحله الباكت من عند حضرتك في الهرم بتسافر لحاااااااااد امريكا وترجعلك في اقل من ثانيه. من نقطه لنقطه ومن سيرفر لسيرفر رايح جاي رايح جي

اتعلمنا ايه من الدرس ده

اول حاجه رحلت المعلومات من كمبيوتر او موبايل حضرتك للسيرفر الي عليه الحاجه الي انت عايزها رايح جي

تاني حاجه اتعلمناها يعني ايه تشفير ، يعني محدش يفهم الكلام الي مبعوت الا انت وعبدو الي في الحاله دي اسمه designated URL او destination IP

وقدرنا نعرف يعني ايه Hacker ، الي هوه في حالتنا كان اسمه ابوعبيد

وعرفنا يعني ايه الرووتينج باث Routing Path وهيه مجموعه الناس او السيرفرات الي هتنقل الرساله المبعوته من غر ما اساسا تبقي عارفه الرساله فيها ايه هيه بتقول للبعدها وصل الرساله لفلان الفلاني وقوله ٢٨٣٥٨٩٤٥٩٨٧

بس يا سيدي دي فكره مبسطه عن فكرة التشفير او الانكريبشن Encryption رحله ممكن تكون طويله جدا بالنسبه للبني ادمين بس بتحصل مع كل واحد فينا يوميا ومحدش شغل باله ازاي بتحصل.

ولو حابب تفهم عن شكل وطريقه الانكريبشن Encryption انا كاتب كود بيخبي مجموعه حروف وارقام في كلمه كبيره بالنسبه لأي حد يشوفها ميفهمش منها حاجه والوحيد الي يقدر يفهمها هوه الي هيستقبلها ، لو حابب تتفرج علي الكود وتجربه ، بس لازم يبقي عندك ولو خلفيه بسيطه عن البرمجه والكود